سید تسنیم حیدر کو پولیس نے تفتیش کے لیے طلب کرلیا

برطانوی دارالحکومت لندن میں سابق وزیرِ اعظم پاکستان میاں نواز شریف پر قتل کے سنگین الزامات لگانے والے سید تسنیم حیدر کو پولیس نے تفتیش کے لیے طلب کر لیا۔

لندن پولیس کی طرف سے طلب کیےجانے کی تسنیم حیدر نے ’جیو نیوز‘ کو تصدیق کی ہے۔

کاؤنٹر ٹیرر ازم پولیس کے افسران رواں ماہ کے وسط میں تسنیم شاہ کے انٹرویوز کریں گے، یہ پولیس افسران تسنیم حیدر سے 2 دن مسلسل انٹرویو کریں گے، پولیس اس سے قبل بھی تسنیم حیدر سے 2، 3 انٹرویو کر چکی ہے۔

تسنیم حیدرنے ارشد شریف کےقتل کا الزام نواز شریف، مریم نواز اور ناصر بٹ پر لگایا تھا۔

آج تک اسکاٹ لینڈ یارڈ نے شریف فیملی یا ناصر بٹ کو تسنیم حیدر کے الزامات پر طلب نہیں کیا۔

پولیس ذرائع کے مطابق تسنیم حیدر اور ان کے وکیل اب تک الزامات کی سچائی کے حوالے سے شواہد مہیا کرنے میں ناکام رہے ہیں۔

پولیس ذرائع کا کہنا ہے کہ تسنیم حیدر کے دعوؤں کا جائزہ لے رہے ہیں، تفتیش کے دوران تسنیم شاہ کو مترجم بھی فراہم کیا جائے گا۔

تسنیم حیدر کے الزامات کی انویسٹی گیشن کاؤنٹرز ٹیرر ازم پولیس کے افسران کر رہے ہیں۔

تسنیم حیدر کے الزامات اور معاملے کی تفتیش کاؤنٹر ٹیرر ازم پولیس کا ایس او 15 ڈویژن کر رہا ہے۔

ناصر بٹ نے تسنیم حیدر کے الزامات کے بعد پولیس میں ان کے خلاف رپورٹ درج کرائی تھی۔

ناصر بٹ کا مؤقف ہے کہ تسنیم حیدر کے الزامات میں کوئی حقیقت نہیں، ارشد شریف کی والدہ بتا چکی ہیں کہ ان کے بیٹے کے قتل کے حوالے سے انہیں کن پر شبہ ہے۔

ناصر بٹ کا مزید کہنا ہے کہ ارشد شریف کی والدہ سپریم کورٹ میں کہہ چکی ہیں کہ چیئرمین پی ٹی آئی اور مراد سعید کو طلب کیا جائے۔

ناصر بٹ کا یہ بھی کہنا ہے کہ ارشد شریف سے ہمارا تو کچھ لینا دینا نہیں تھا، بے بنیاد الزامات لگانے والوں کو جواب دینا ہو گا۔