گورنر سندھ محمد کامران خان ٹیسوری نے اسپیشل سیکیورٹی یونٹ ہیڈ کوارٹرز کا دورہ کیا ہے۔
اس موقع پر ڈی آئی جی سیکیورٹی اینڈ ایمرجنسی سروسز ڈویژن کراچی ڈاکٹر مقصود احمد نے ان کا استقبال کیا جبکہ ایس ایس یو کے خصوصی دستے نے انہیں سلامی پیش کی۔
گورنر سندھ کامران ٹیسوری نے ڈی آئی جی سیکیورٹی اینڈ ایمرجنسی سروسز ڈویژن کراچی کے ہمراہ اسلحہ خانے، فائرنگ رینج اور ایس ایس یو کے مختلف شعبوں کا دورہ کیا اور ایس ایس یو کی موجودہ پیشہ ورانہ مہارت اور انتظامات کو مثالی قرار دیا۔
ڈی آئی جی ڈاکٹر مقصود احمد نے گورنر سندھ کامران ٹیسوری کو ایس ایس یو کے قیام سے لے کر جدت سے آراستہ یونٹ کی تشکیل تک کے سفر کے بارے میں آگا ہ کیا۔
انہو ں نے بتایا کہ ملک میں پہلی مرتبہ ایس ایس یو سندھ پولیس میں S.W.A.T ٹیم قائم کی گئی ہے جس میں کمانڈوز بشمول لیڈی کمانڈوز تربیت یافتہ اور جدید ہتھیاروں سے لیس ہیں جو کسی بھی ناخوش گوار حالات سے نمٹنے کے لیے ہمہ وقت تیار ہیں، کمانڈوز کی پیشہ وارانہ مہارت میں مزید اضافے کے لیے پاکستان آرمی انہیں مختلف ٹریننگ انسٹیٹیوٹس میں تربیت فراہم کر رہی ہے۔
ڈی آئی جی سیکیورٹی اینڈ ایمرجنسی سروسز ڈویژن کراچی نے سندھ پولیس کے ذیلی ادارے مددگار 15 میں کی جانے والی اصلاحات اوراپ گریڈیشن کے بارے میں بھی گورنر سندھ کو آگاہ کیا کہ مددگار 15 کا کسی بھی ایمرجنسی صورتِ حال میں ریسپانس ٹائم 30-40 منٹ تھا جو اب محدود ہو کر 07-10 منٹ ہو گیا ہے۔
گورنر سندھ کامران خان ٹیسوری نے ایس ایس یو کے انتظامی، سیکیورٹی اور انسدادِ دہشت گردی امور میں اعلیٰ پیشہ وارانہ معیار کو سراہا اور سندھ پولیس کے شہداء کو خراجِ تحسین پیش کرتے ہوئے کہا کہ شہر اور صوبے کا امن برقرار رکھنے میں سندھ پولیس اہم کردار ادا کر رہی ہے۔
گورنرسندھ نے S.W.A.T ٹیم کی جانب سے دہشت گردوں سے نمٹنے کے لیے مشقوں کا بھی مشاہدہ کیا۔
گورنر سندھ کے ایس ایس یو ہیڈ کوارٹرز کے دورے کے موقع پر کمانڈنٹ ایس ایس یو ڈاکٹر فرخ علی لنجار، ایس ایس پی مددگار 15 امجد حیات، ایس ایس پی سیکیورٹی II سید سلمان احمد، ایس پی فارنرز سیکیورٹی سیل صدام حسین، ایس پی ایس ایس یو انیل حیدر اور ایس پی ایس ایس یو فرح امبرین بھی موجود تھیں۔
بعد ازاں ڈی آئی جی سیکیورٹی ڈاکٹر مقصود احمد نے گورنر سندھ کامران ٹیسوری کو اعزازی شیلڈ پیش کی۔
