وزیراعظم شہباز شریف کا آئی ایم ایف کی ایم ڈی سے ٹیلی فون پر گفتگو

وزیراعظم شہباز شریف نے عالمی مالیاتی ادارے کی منیجنگ ڈائریکٹر کرسٹالینا جارجیوا سے ٹیلی فون پر گفتگو کی ہے۔

اس موقع پر ایم ڈی آئی ایم ایف نے وزیراعظم سے گفتگو میں ماضی کی پیدا کردہ بےاعتمادی کا ذکر کیا اور کہا کہ ادارے کو ماضی کی پیدا کردہ بےاعتمادی کی وجہ سے تحفظات تھے۔

کرسٹالینا جارجیوا نے کہا کہ یقین ہے کہ وزیراعظم شہباز شریف وعدوں کو پورا کریں گے۔

انہوں نے کہا کہ وزیراعظم نے پیرس میں ملاقات میں معاہدہ پورا کرنے کی دانش مندی اور عزم دکھایا، وزیراعظم نے جو لیڈرشپ دکھائی وہ لائق تحسین اور قابلِ تعریف ہے۔

’پاکستان آئی ایم ایف کا اہم رکن ہے‘
کرسٹالینا جارجیوا نے وزیراعظم سے گفتگو کرتے ہوئے مزید کہا کہ پاکستان آئی ایم ایف کا اہم رکن ہے، پاکستان اور آئی ایم ایف کے درمیان اب مضبوط شراکت داری اور باہمی اعتماد استوار ہوچکا ہے۔

اس موقع پر وزیراعظم نے کہا کہ آپ نے بڑی راست گوئی اور مثبت انداز سے پیرس میں ہونے والی ملاقات میں گفتگو کی تھی، آپ کے قیمتی الفاظ پر آپ کا بے حد شکریہ ادا کرتا ہوں۔

وزیراعظم نے ایم ڈی آئی ایم ایف سے گفتگو کرتے ہوئے کہا کہ معاشی ٹیم کو واضح کیا ہے کہ معاہدے کی ذرا سی خلاف ورزی بھی برداشت نہیں کروں گا۔

’12 اگست تک ہماری حکومت ہے‘
شہباز شریف نے کرسٹالینا جارجیوا کو بتایا کہ 12 اگست تک ہماری حکومت ہے پھر نگراں حکومت آ جائے گی جو معاہدے کا احترام جاری رکھے گی۔

انہوں نے کہا کہ عوام نے منتخب کیا تو آئی ایم ایف کی مدد سے معیشت کو ٹرن آ راؤنڈ کریں گے۔

’آپ کیلئے آموں کا تحفہ بھجوا رہا ہوں‘
وزیراعظم نے کہا کہ پاکستان دنیا کے بہترین اور لذیز ترین آم پیدا کرتا ہے، آپ کے لیے احترام کے جذبے کے طور پر آموں کا تحفہ بھجوا رہا ہوں۔

وزیراعظم نے ایم ڈی آئی ایم ایف کے پروفیشنل ازم اور لیڈرشپ کو خراج تحسین پیش کیا اور ان کے غریب عوام کے لیے جذبے اور احساس کو بھی سراہا۔

شہباز شریف نے کہا کہ آپ نے جس طرح پاکستان کی معاونت کی اس کا شکریہ ادا کرنے کے لیے الفاظ نہیں۔

اس موقع پر آئی ایم ایف کی ایم ڈی نے کہا کہ آئی ایم ایف پاکستان کی ہر ممکن حد تک مدد کرتا رہے گا۔