بھارتی کاسٹنگ ایجنسی سے کام کی پیشکش ہوئی ،ارسلان خان کا انکشاف

پاکستان شوبز انڈسٹری میں ماڈلنگ سے اداکاری کی دنیا میں قدم رکھنے والے فنکار ارسلان خان نے پڑوسی ملک میں کام کرنے کی خواہش کا اظہار کرتے ہوئے انکشاف کیا کہ انہیں بھارتی کاسٹنگ ایجنسی سے کام کی پیشکش ہوئی ہے۔

حال ہی میں اداکارہ حرا خان کے ساتھ رشتہ ازدواج میں منسلک ہونے والے اداکار ارسلان خان نے گزشتہ روز فوٹو اینڈ ویڈیو شیئرنگ پلیٹ فارم انسٹاگرام پر سوال جواب رکھا۔

دوران سیشن ایک مداح نے ان سے کہا کہ ’آپ بھارتی اداکار کی طرح دکھائی دیتے ہیں، کیا آپ بھارت میں کام کرنا چاہیں گے؟‘۔

مداح کے سوال پر اداکار ارسلان نے ماضی کا ایک واقعہ بیان کرتے ہوئے بھارت میں کام کرنے کی خواہش کا اظہار کیا اور بتایا کہ انہیں بھارتی اداکار و پروڈیوسر سرگن مہتا کی جانب سے اداکاری کی پیشکش ہو چکی ہے۔

ارسلان خان نے مزید لکھا کہ سرگن مہتا کی ٹیم نے ان سے یہ سمجھ کر رابطہ کیا کہ شاید میں بھارتی اداکار ہوں تاہم جب انہیں حقیقت کا علم ہوا تو وہ بھی حیران رہ گئے تاہم مجھے پڑوسی ملک میں کام کرکے خوشی ہوگی‘۔

واضح رہے کہ ارسلان خان نے اپنا شوبز کیریئر ماڈلنگ سے شروع کیا تاہم اس سے قبل انہوں نے بیڈمنٹن چیمپئن شپ کے کئی عالمی مقابلوں میں پاکستان کی نمائندگی کی ہے۔