اسلام آباد ہائی کورٹ کے چیف جسٹس عامر فاروق نے بغیر گاؤن پہنے پیش ہونے پر وکیل پر برہمی کا اظہار کیا ہے۔
چیف جسٹس اسلام آباد ہائی کورٹ نے وکیل سے سوال کیا کہ آپ یونیفارم میں کیوں نہیں، کیا آپ ہائی کورٹ کے وکیل ہیں، آپ کا گاؤن کہاں ہے، کیا آپ نے ہائی کورٹ کا نوٹیفکیشن نہیں پڑھا؟
وکیل نے جواب دیا کہ میں معذرت خواہ ہوں، ایمرجنسی ہو گئی تھی، گاؤن نہیں پہن سکا۔
چیف جسٹس نے کہا کہ ایمرجنسی ہو گئی ہے؟ کیا ایمبولینس منگوائیں، یہ کیا طریقہ ہے، کل کو میں اگر ٹی شرٹ اور جینز پہن کر یہاں بیٹھ جاؤں تو کیسا لگے گا؟
انہوں نے یہ بھی کہا کہ گزشتہ روز بھی بتایا تھا کہ گاؤن لازمی پہننے کا ایک نوٹیفکیشن جاری ہو چکا ہے، تمام وکلاء گاؤن پہن کر ہائی کورٹ میں پیش ہوں۔
