دبئی میں برطانوی ٹینس اسٹار ایما ریڈوکانو کو میچ کے دوران ہراساں کرنے والے شخص کو حراست میں لے لیا گیا۔
دبئی ڈیوٹی فری ٹینس چیمپئن شپ کے دوران میچ کے دوسرے راؤنڈ میں ایما ریڈوکانو کو احساس ہوا تھا کہ ایک شخص اسٹینڈ میں انتہائی قریب بیٹھ کر انہیں گھور رہا ہے جس پر خاتون کھلاڑی اور اس شخص کے درمیان مبینہ طور پر بعض جملوں کا تبادلہ بھی ہوا۔
میڈیا رپورٹس کے مطابق اس واقعے پر ٹینس اسٹار زار و قطار رو پڑی تھیں اور انہوں نے امپائر کو شکایت بھی کی تھی جس پر اس شخص کو حراست میں لے لیا گیا۔
دبئی پولیس کے مطابق ایک سیاح کو حراست میں لیا گیا ہے جو دبئی میں ایما ریڈوکانو کے قریب آیا تھا، انہیں ایک پرچہ دیا، ان کی تصویر کھینچی اور ایسا رویہ اختیار کیا جس سے ٹینس اسٹار پریشان ہو گئی تھیں۔
برطانوی ٹینس اسٹار ایما ریڈوکانو کے کوچ نے انکشاف کیا ہے کہ دبئی ڈیوٹی فری ٹینس چیمپئن شپ کے دوران اسٹینڈ میں جس شخص کی وجہ سے خاتون کھلاڑی ہراساں ہوئیں وہ شخص 4 ممالک میں ہوئے میچز میں بھی موجود تھا۔
خاتون پلیئر کے کوچ کے مطابق اب اس شخص کو پولیس کی جانب سے حکم دیا گیا ہے کہ وہ خاتون کھلاڑی سے دور رہے۔
ٹینس اسٹار کے کوچ کا کہنا ہے کہ ایما ریڈوکانو کے پاس دبئی میں ایک ایسا شخص آیا تھا جسے وہ پہلے بھی کئی بار دیکھ چکی تھیں، ابتداء میں وہ سمجھے کہ یہ محض مداح ہے تاہم رفتہ رفتہ وہ خاتون کھلاڑی کے قریب آیا، سیلیفیاں لینا شروع کیں اور سیکیورٹی گارڈ نہ ہونے کا موقع پا کر انہیں گلے لگا لیا۔
کوچ کے مطابق یہ شخص سنگاپور اور قطر میں بھی کھلاڑی کا پیچھا کرتا رہا تھا، اب اس شخص کے ڈبلیو ٹی اے ٹینس دیکھنے آنے پر پابندی لگا دی گئی ہے۔
