بالی ووڈ کے سُپر اسٹار اداکار شاہ رخ خان، اجے دیوگن اور ٹائیگر شروف کو گمراہ کُن اشتہار پر عدالت میں حاضر ہونے کا نوٹس جاری کر دیا گیا۔
بھارتی میڈیا رپورٹس کے مطابق ریاست راجھستان کے شہر کوٹا میں بالی ووڈ کے اداکاروں کے خلاف پان مسالہ برانڈ ’الائچی‘ کی توثیق کرنے پر شکایت درج کرائی گئی ہے، جس کے بعد ان تینوں کے خلاف قانونی کارروائی شروع ہو گئی ہے۔
شاہ رخ خان، اجے دیوگن اور ٹائیگر شروف کے پان مسالہ برانڈ کے گمراہ کن اشتہار اور اس کی ٹیگ لائن ’بولو زبان کیسری‘ نے سب کی توجہ حاصل کر لی ہے، جس کے سبب اندر موہن سنگھ ہانی نامی شخص نے تینوں اداکاروں کے خلاف شکایت درج کرائی ہے۔
انہوں نے شکایت میں دعویٰ کیا ہے کہ اشتہار میں جھوٹی معلومات کو فروغ اور خاص طور پر نوجوانوں کو نشانہ بنایا جا رہا ہے۔
شکایت کنندہ کا کہنا ہے کہ شاہ رخ خان، اجے دیوگن، اور ٹائیگر شروف کئی نوجوانوں کے لیے رول ماڈل ہیں اور وہ ایسی پروڈکٹ جس میں کیسر (زعفران) شامل نہیں، اس کی توثیق کر کے نوجوانوں کو گمراہ کر رہے ہیں۔
درخواست میں مزید کہا گیا ہے کہ کمپنی نے اپنے دعوؤں کی حمایت کے لیے کوئی ثبوت فراہم نہیں کیا، مزید برآں، پیکیجنگ پر مبینہ طور پر انتباہ اتنے چھوٹے حروف میں لکھا گیا ہے کہ اسے پڑھنا تقریباً ناممکن ہے، جس سے شفافیت کے بارے میں خدشات پیدا ہوتے ہیں۔
درخواست گزار نے اشتہار پر فوری پابندی اور اداکاروں اور کمپنی کے خلاف فوری جرمانے کا مطالبہ کیا ہے۔
میڈیا رپورٹس کے مطابق کوٹا کنزیومر ڈسپیوٹ ریڈرسل کمیشن نے شکایت پر عمل درآمد کرتے ہوئے شاہ رخ خان، اجے دیوگن، ٹائیگر شروف اور ویمل پان مسالہ بنانے والوں کو نوٹس جاری کرتے ہوئے عدالت میں حاضر ہونے کی ہدایت کی ہے۔
