قومی اسمبلی میں اپوزیشن لیڈر عمر ایوب کا کہنا ہے کہ وہ دن دور نہیں جب وزیرِ اعظم بانی پی ٹی آئی ہوں گے۔
راولپنڈی کی انسداد دہشت گردی کی عدالت کے باہر میڈیا سے گفتگو کرتے ہوئے انہوں نے کہا کہ آج اسلام آباد میں اپوزیشن جماعتوں کی بڑی بیٹھک ہونی ہے، بیٹھک کا مقام 2 سے 3 مرتبہ تبدیل کیا گیا لیکن آج ہم بیٹھیں گے۔
عمر ایوب کا کہنا ہے کہ یہ حکومت کٹھ پتلی حکومت ہے، پاکستان میں بدقسمتی سے کٹھ پتلی راج ہے، حکومت نے ہماری جدوجہد کو روکنے کی بار بار کوشش کی۔
پی ٹی آئی کے رہنما نے مزید کہا کہ جمہوریت کی بحالی کے لیے سڑکوں پر اور ایوانوں میں بھی احتجاج ہوتا ہے۔
ان کا یہ بھی کہنا ہے کہ لاہور ہائی کورٹ بار، راولپنڈی بار اور اسلام آباد بار سب جگہ پی ٹی آئی جیتی ہے۔
