وسطی امریکا کی شمال مشرقی ساحلی پٹی پر واقع ملک بیلیز سے 3 امریکی سیاح خواتین کی لاشیں ملی ہیں۔
غیر ملکی میڈیا کے مطابق حال ہی میں بیلیز کا دورہ کرنے والی تینوں امریکی سیاح خواتین کی لاشیں ساحلی تفریحی مقام سے ملیں۔
مقامی حکام نے شبہ ظاہر کیا ہے کہ ممکنہ طور پر منشیات کی زیادہ مقدار کی وجہ سے خواتین کی موت واقع ہوئی ہے۔
مرنے والی خواتین کی عمر 23، 24 اور 26 سال تھی، ہوٹل کے عملے نے خواتین سے جمعے کو رابطہ کرنے کی کوشش کی تاہم ناکامی کے بعد عملہ ماسٹر کی (چابی) کے ذریعے کمرے میں داخل ہوا جہاں تینوں خواتین کی لاشیں موجود تھیں۔
غیر ملکی میڈیا کے مطابق خواتین کی اموات کے حوالے سے تفتیش جاری ہے۔
حکام کا کہنا ہے کہ خواتین کے منہ سے جھاگ خارج ہو رہا تھا جو منشیات کی زیادہ مقدار کا اشارہ ہے۔
میڈیا رپورٹس کے مطابق حکام کو کمرے میں سے شراب اور دیگر نشہ آور چیزیں بھی ملی ہیں جن کے بارے میں تحقیقات کی جا رہی ہیں کہ انہیں امریکا سے لایا گیا تھا یا مقامی لوگوں سے خریدا گیا تھا۔
مقامی حکام کے مطابق خواتین کے جسم پر تشدد کے نشانات نہیں اور نہ ہی ان کے کمرے میں کسی کے آنے کے شواہد ملے ہیں۔
