جنرل سید عاصم منیر کا دورۂ برطانیہ،بغیر پائلٹ سسٹمز سمیت جدید ٹیکنالوجیز کا مشاہدہ

آرمی چیف جنرل سید عاصم منیر نے دورۂ برطانیہ کے دوران مصنوعی ذہانت اور بغیر پائلٹ سسٹمز سمیت جدید ٹیکنالوجیز کا مشاہدہ کیا ہے۔

انٹر سروسز پبلک ریلیشنز (آئی ایس پی آر) کے مطابق آرمی چیف جنرل سید عاصم منیر نے برطانیہ کے جنرل رولینڈ واکر کی دعوت پر وار منسٹر اور لارک ہل گیریژنز کا دورہ کیا۔

اس موقع پر آرمی چیف کو برطانوی فوج کے جدیدیت کے منصوبے اور ڈیپ ریکی اسٹرائیک بریگیڈ پر بریفنگ بھی دی گئی۔

اس سے قبل وفاقی وزیرِ اطلاعات و نشریات عطا تارڑ نے کہا تھا کہ آرمی چیف برطانیہ کے دورے پر ہیں جہاں ان کا پرتپاک استقبال کیا گیا، جس سے پاکستان کی عزت اور وقار میں اضافہ ہوا۔

ان کا کہنا تھا کہ پاک فوج کی پیشہ ورانہ صلاحیتوں کی پوری دنیا معترف ہے۔