جناح ہاؤس لاہور اور ملٹری انجنیئرنگ سروسز کے دفتر عوام اور سول سوسائٹی کیلئے کھول دیے گئے

جناح ہاؤس لاہور اور ملٹری انجنیئرنگ سروسز کے دفتر عوام اور سول سوسائٹی کیلئے کھول دیے گئے، عوام اور سول سوسائٹی نے نو مئی کو یوم سیاہ قرار دیکر دہشتگردی کی شدید الفاظ میں مذمت کرتے ہوئے پاک فوج سے یکجہتی کا اظہار کیا۔

نو مئی کو پاکستان تحریک انصاف کے مشتعل ہجوم نے جناح ہاؤس لاہور پر ہلہ بول کر اس تاریخی عمارت کو نذر آتش کردیا تھا، گمراہ ٹولے نے پی اے ایف بیس ایم ایم عالم میانوالی کو بھی نہ بخشا اور عظیم ہیروز کی یادگار توڑ ڈالیں اور فخر و عزت کی علامات گرا کر جلا ڈالیں۔

نو مئی کو مملکت خداداد پاکستان کے وجود پاک پر کشت و خون اور جلاو گھیراو کی وہ ناپاک و دلخراش ہولی کھیلی گئی کہ ہر محب وطن پاکستانی خصوصاً شہدا وطن کے وارثوں کے دل چھلنی اور آنکھیں اشکبار ہو گئیں، اس روز ارض وطن نے وہ دلگداز مناظر دیکھے جو اپنے قیام سے آج تک کبھی نہ دیکھے، جناح ہاؤس لاہور جس نے قائد اعظم کے قدم چومے اور انہیں اپنی آغوش میں آرام دیا، اپنوں ہی کی نفرت، حقارت اور بے جا انتقام کی بھینٹ چڑھ گیا۔

ارض پاک کی داستان سے نا آشنا بلوائیوں نے جہاں تاریخی ورثے کور کمانڈر ہاؤس کے گل و گلزار بے دردی سے روند ڈالے وہاں، اس نشان دلکش و دل افروز کے در و دیوار ہلا کر رکھ دیے، جناح ہاؤس کا سارا سامان زینت و آرائش جلا کر راکھ کر دیا گیا۔

مشتعل کارکنان نے پی اے ایف بیس ایم ایم عالم میاں والی کو بھی نہ بخشا، بیس کے صدر دروازے پر بنی ان شہدا کی یاد گار پتھروں اور ڈنڈوں سے توڑ ڈالی جنہوں نے قربانیاں دے کر خاک وطن کو عزت و ناموس سے سرفراز کیا۔

بلوائیوں کی جانب سے پاک فضائیہ کے وہ جہاز جو دشمن کیلئے ہیبت اور وطن کیلئے محبت کے علامت و آرائش تھے، توڑے گئے، گرائے گئے اور جلادیے گئے، عوام کی جانب سے قومی املاک اور تاریخی اثاثوں کے تقدس کی پامالی پر گہرے دکھ اور رنج کا اظہار کیا گیا۔