اب کراچی کے نارتھ ناظم آباد میں واقع نادرا میگا سینٹر میں بھی پاسپورٹ بنے گا۔
وفاقی وزیرِ داخلہ محسن نقوی نے کراچی میں نادرا میگا سینٹر نارتھ ناظم آباد میں پاسپورٹ آفس کا افتتاح کر دیا۔
یہ پاسپورٹ آفس 3 شفٹ میں24/7 کام کرے گا۔
اس موقع پر وزیرِ داخلہ محسن نقوی نے پاسپورٹ بنوانے کے کاؤنٹرز کا معائنہ کیا اور عملے سے ملاقات کی۔
وزیرِ داخلہ نے شناختی کارڈز اور پاسپورٹ بنوانے کے لیے آئے شہریوں سے بھی ملاقات کی۔
اس دوران شہریوں نے بہترین سہولتوں کی فراہمی پر اطمینان کا اظہار کیا اور وزیرِ داخلہ کا شکریہ ادا کیا۔
شہریوں کا کہنا تھا کہ بہت زبردست سہولت ملی ہے، آپ نے ہمارے لیے بہت آسانیاں پیدا کر دی ہیں۔
وفاقی وزیرِ داخلہ محسن نقوی نے بی آئی ایس پی کے تحت بائیو میٹرک کرانے والی خواتین کے مسائل سنے اور موقع پر ہی متعلقہ حکام کو حل کے لیے ہدایات دیں۔
اس موقع پر بزرگ خواتین نے مسائل کے حل کے لیے فوری احکامات پر وزیرِ داخلہ محسن نقوی کا شکریہ ادا کیا۔
وزیرِ داخلہ محسن نقوی نے کہا کہ آپ کے مسائل حل کرنا ہماری ذمے داری ہے۔
علاوہ ازیں وزیرِ داخلہ محسن نقوی کو نادرا سینٹر میں قائم پاسپورٹ آفس کی ورکنگ پر بریفنگ بھی دی گئی۔
