ایک جاپانی کمپنی نے کراچی کے دو دریا سے لے کر پورٹ قاسم تک فیری سروس متعارف کروانے کی تجویز پیش کی ہے جوکہ یقیناََ شہریوں کے لیے ایک خوشی کی خبر ہے۔
جاپانی کمپنی نے یہ تجویز وزیراعلیٰ سید مراد علی شاہ اور یاماہا جاپان کے سینئر جنرل منیجر برائے وسطی ایشیا اور مشرق وسطیٰ یوشیوکی کے درمیان ہونے والی ملاقات میں پیش کی ہے۔
Karachi (July 4th, 2023) Sindh Chief Minister Syed Murad Ali Shah discusses water sports projects with Senior General Manager Yamaha Japan for Central Asia & Middle East Mr. Yoshiyuki ITO who called on him at CM House. pic.twitter.com/gBjCZ7CGCm
— Sindh Chief Minister House (@SindhCMHouse) July 4, 2023
وزیراعلیٰ ہاؤس کی جانب سے جاری کردہ ایک بیان کے مطابق، یوشیوکی نے صوبہ سندھ کے مختلف بیراجوں اور جھیلوں پر پانی کے کھیلوں کی سہولیات کو فروغ دینے پر تبادلہ خیال کیا، جس میں دو دریا سے لے کر پورٹ قاسم تک فیری سروس کا آغاز بھی شامل ہے۔
مراد علی شاہ کاکہنا ہے کہ یاماہا پاکستان کے تعاون سے کینجھر، گڈو، سکھر اور کوٹری بیراج پر پانی کے کھیلوں کی سہولیات فراہم کرنے کی بہت اچھی گنجائش ہے۔
انہوں نے یہ بھی کہا کہ یہ سہولیات نجی شعبے کی مدد سے قائم کی جا سکتی ہیں۔
یوشیوکی نے وزیراعلیٰ سندھ کو بتایا کہ فیری سروس ٹرانسپورٹ اور تفریح دونوں طرح کی سہولیات کے لیے قائم کی جا سکتی ہے۔
