پی ٹی آئی اس قابل نہیں کہ اس سے ملاقات کی جائے:عظمیٰ بخاری

وزیرِ اطلاعات پنجاب عظمیٰ بخاری نے کہا ہے کہ پی ٹی آئی اس قابل نہیں کہ اس سے ملاقات کی جائے، ہم اسے لاہور آنے دے رہے ہیں، یہ بہت بڑا احسان ہے۔

لاہور میں میڈیا سے گفتگو کرتے ہوئے انہوں نے کہا کہ کیا سیاسی جماعتیں اسلحہ لے کر آتی ہیں؟ علی امین گنڈاپور کے واٹس ایپ گروپ پر دکھایا جا رہا ہے کہ کارکن ڈنڈوں اور اسلحے کے ساتھ نکل رہے ہیں، علی امین ریسکیو 1122 کی گاڑیاں لے کر نکل رہے ہیں۔

عظمیٰ بخاری نے کہا کہ رات کو تحریکِ فساد کا پھر چہرہ دیکھا گیا، آگ لگانا بھی کیا کسی سیاسی جماعت کا ٹریک ریکارڈ ہو سکتا ہے؟ اس شہر کو دوبارہ بنایا اور سنوارا جا رہا ہے، یہ صرف گند ہی ڈال سکتے ہیں۔

انہوں نے کہا کہ پنجاب میں ریسکیو 1122 ایئر ایمبولینس میں مریضوں کو منتقل کر رہے ہیں، پنجاب کا دیگر صحت کا عملہ عوام کو سہولت دینے میں مصروف ہے، علی امین گنڈاپور کھل کر جلسہ کریں، جلسے میں کسی کی طبیعت خراب ہوئی تو اس کو ایئر ایمبولینس کے ذریعے اسپتال پہنچا دیں گے۔

ن لیگی رہنما نے کہا کہ علی امین گنڈاپور کرینیں لا رہے ہیں، وہ پچھلے 6 ماہ سے صرف جلوس نکال رہے ہیں، شیر افضل مروت کو کورونا ہو گیا، عمر ایوب کی بھی طبیعت خراب ہے۔

عظمیٰ بخاری نے کہا کہ جلسہ گاہ جانے والی کوئی بھی سڑک بند نہیں کی گئی، تحریکِ فساد کل رات توڑ پھوڑ کے دو تین واقعات کر چکی ہے، گنڈاپور صاحب کہہ رہے ہیں کہ وہ شاید جلسہ گاہ نہ پہنچ پائیں۔

انہوں نے کہا کہ ڈو اور ڈائی کا لفظ برداشت نہیں کیا جائے گا، ہم آپ کو جانتے اور سمجھتے ہیں، اسی کے مطابق تمام تیاری ہوتی ہے، کسی کو قانون ہاتھ میں لینے کی اجازت نہیں دی جائے گی۔

عظمیٰ بخاری نے کہا کہ 6 بجے تک جلسہ ختم کرنے کی ذمے داری منتظمین پر عائد ہوتی ہے، جلسہ گاہ میں آپ کو کیا انتظامات کرنے ہیں، یہ آپ کی ذمے داری ہے، گنڈاپور تحریری معذرت نہ کریں جلسے میں معافی مانگ لیں، ہم قبول کر لیں گے۔

انہوں نے کہا کہ اگر کوئی 9 مئی کا اشتہاری جلسہ گاہ میں موجود ہو گا یا فتنہ فساد کی کوشش کرے گا تو اس کو دیکھا جا سکتا ہے، وزیرِ اعلیٰ پنجاب نے ان کو موقع دیا ہے کہ یہ سیاسی جماعت بن سکیں، میرے مطابق ان میں سیاسی جماعت کا خمیر نہیں۔