دُنیا بھر میں سوئنگ کے سلطان کے لقب سے مشہور قومی کرکٹ ٹیم کے سابق کپتان وسیم اکرم کی اہلیہ شنیرا اکرم نے اپنے شوہر کا نام طلاق یافتہ افراد کی فہرست دیکھ کر برہمی کا اظہار کیا ہے۔
سماجی رابطے کی ویب سائٹ ایکس پر ایک سوشل میڈیا پیج نے مختلف ممالک کی کرکٹ ٹیم سے تعلق رکھنے والے 12 کھلاڑیوں کی فہرست جاری کرتے ہوئے ان کی طلاق ہونے کا دعویٰ کیا ہے۔
اس فہرست میں پاکستانی سابق کپتان فاسٹ بالر وسیم اکرم اور بھارتی کھلاڑی انیل کمبلے کے نام بھی شامل ہیں جنہیں کوئی طلاق نہیں ہوئی ہے۔
سوشل میڈیا کی مذکورہ پوسٹ نے سماجی کارکن اور کرکٹ لیجنڈ وسیم اکرم کی اہلیہ کی توجہ فوراً حاصل کر لی۔
شنیرا اکرم نے جھوٹی خبریں پھیلانے پر سوشل میڈیا پیج کو آڑے ہاتھوں لے لیا اور پوسٹ کو ری شیئر کرتے ہوئے ان پر برس پڑیں۔
انہوں نے جھوٹ پر مبنی پوسٹ کو ری شیئر کرتے ہوئے لکھا کہ بلاشبہ آپ لوگ ہر چیز سیاق و سباق سے ہٹ کر لکھتے ہیں، صرف یہی نہیں آپ لوگ درست اور قابلِ اعتماد معلومات سے بھی محروم ہیں۔
انہوں نے اس کے ساتھ ہی خبروں کو شیئر کرنے سے پہلے اس کی تصدیق پر بھی زور دیا ہے۔
واضح رہے کہ وسیم اکرم نے شنیرا سے قبل ہما مفتی سے 12 اکتوبر 1993ء کو پسند کی شادی کی تھی۔
ماہرِ نفسیات ہما مفتی انگلش لٹریچر اور سائیکالوجی میں ماسٹر تھیں، انہوں نے کچھ عرصہ شوکت خانم میموریل اسپتال میں بھی کام کیا، تاہم 2009ء میں ہما اکرم 42 سال کی عمر میں علالت کے باعث انتقال کر گئیں۔
لیجنڈ کرکٹر نے 2013ء میں آسٹریلوی نژاد شنیرا اکرم سے شادی کی جن سے ان کی ایک بیٹی عائلہ ہے، عائلہ کی پیدائش 2014ء میں ہوئی تھی۔
دوسری جانب بھارتی کھلاڑی انیل کمبلے نے 1999ء میں طلاق یافتہ چیتنا رامتیرتھا سے پسند کی شادی کی تھی، اس جوڑی کے 2 بچے بیٹا مایاس کمبلے اور بیٹی سواستی کمبلے ہیں جبکہ بھارتی کھلاڑی نے سوتیلی بیٹی ارونی کو بھی گود لیا ہے۔
