سندھ پولیس کے اسپیشل سیکیورٹی یونٹ (ایس ایس یو) کے کمانڈو احمد صدیقی نے باڈی بلڈنگ میں 3 ٹائٹلز جبکہ کمانڈو انتظار علی نے مسٹر حیدرآباد ڈویژن کا ٹائٹل اپنے نام کرلیا۔
باڈی بلڈنگ کے مقابلے ڈسٹرکٹ سینٹرل آرٹس کونسل نیو کراچی میں منعقد ہوئے، جس میں مہارت کا مظاہرہ کرتے ہوئے کمانڈو احمد صدیقی نے باڈی بلڈنگ میں 3 ٹائٹلز اپنے نام کئے جبکہ ایس ایس یو کے ایک اور کمانڈو انتظار علی نے حال ہی میں مسٹر حیدرآباد ڈویژن کا ٹائٹل اپنے نام کیا۔
ڈی آئی جی سیکیورٹی اینڈ ایمرجنسی سروسز ڈویژن ڈاکٹر مقصود احمد نے کمانڈو کو اس کی کامیابی پر مبارکباد دی اور کمانڈو احمد صدیقی کو 1 لاکھ روپے اور کمانڈو انتظار علی کو 50 ہزار روپے نقد انعام دیا۔
ایس ایس یو کمانڈو احمد صدیقی نے مسٹر بیچ فزیک 2023، مسٹر ایتھلیٹک سینٹرل 2023 اور مسٹر اوپن کراچی 2023 کے تین ٹائٹلز اپنے نام کیے۔
ایونٹ میں 6 کیٹیگریز میں آرمی اور اے ایس ایف کے اہلکاروں سمیت 90 سے زائد باڈی بلڈرز نے شرکت کی۔
کمانڈوز نے اپنے خیالات کا اظہار کرتے ہوئے کہا کہ یہ ٹائٹلز جیتنا ان کے لیے بہت بڑی کامیابی اور اعزاز ہے۔
انہوں نے مزید کہا کہ اسپیشل سیکیورٹی یونٹ نے کھیلوں میں ملک کا نام روشن کرنے کے لیے ہمیشہ ان کا ساتھ دیا ہے اور وہ مستقبل میں بھی محکمہ کے اسپانسر سے قومی اور بین الاقوامی سطح پر کامیابیوں کا سفر جاری رکھیں گے۔
