ہمیشہ ہمیں ایک ہی جملہ اکثر سننے کو ملتا ہے کہ بیٹا بڑا ہوگا باپ کا نام روشن کریگا لیکن اب وقت بدل چکا ہے اب بیٹیاں باپ کا نام روشن کر رہی ہیں۔
بیٹیاں ہر شعبے میں صف اول کا رول ادا کر رہی ہیں۔ مریم نواز کے وزیراعلیٰ پنجاب بننے کے بعد پنجاب کی بیٹیوں میں ایک نیا حوصلہ اور جذبہ پیدا ہوا ہے۔ مریم نواز آج جس مقام پر پہنچی ہیں اس میں اللہ تعالیٰ کے بعد انکی اپنی محنت، جدوجہد اور مشکلات سے بھرپور پچھلے پانچ سے چھ سال کا کٹھن ترین سفر ہے۔
مریم نواز کو پنجاب کی وزارت اعلیٰ پلیٹ میں رکھ کر نہیں ملی اور نہ ہی ملکی سیاسی منظر نامے پر انکی مقبولیت کسی کی مرہون منت ہے بلکہ انہوں نے ایک بہادر بیٹی ہونے کے جرم میں پہلے اپنے والد میاں نواز شریف کیساتھ دو مرتبہ بے گناہ جیل کاٹی پھر اس دوران ان کو ہر طرح سے اذیتیں پہنچانے کی بھی کوشش کی گئی۔
انکا میڈیا ٹرائل کیا گیا لیکن مریم نواز نے ہمت نہیں ہاری۔ وہ ان مشکلات کے دور میں ذاتی کردار کشی سے خوف زدہ ہونے کی بجائے اپنے والد کیساتھ ڈٹ کر اور قدم سے قدم ملا کر کھڑی رہیں۔ اسکا صلہ اللہ تعالیٰ نے انکو پنجاب کی پہلی خاتون وزیراعلیٰ بنا کر دیا۔ پنجاب کے عوام نے مریم نواز کو تاریخ کے سب سے بڑے مینڈیٹ سے عزت بخشی۔
مریم نواز پہلے کبھی کسی سیاسی انتظامی یا ریاستی عہدے پر نہیں رہیں اسکے باوجود انکا انتظامی معاملات کو احسن طریقے سے چلانا لائق تحسین ہے۔ مریم نواز نے بطور وزیراعلیٰ پنجاب پہلے سال میں وہ تاریخی اور انقلابی اقدامات اٹھائے جو ان سے پہلے ملک کی تاریخ کے تجربہ کار حکمران بھی نہیں عوام کے لئے کر سکے ۔
ایک سال میں 90سے زائد عوامی فلاح و بہبود کے منصوبے شروع کرنا کوئی معمولی بات نہیں ہے اور ان منصوبوں میں سے 50سے زائد منصوبے مکمل بھی کر دیے۔ان میں اپنی چھت اپنا گھر،الیکٹرک بائیکس،الیکٹرک بسیں،آسان کاروبار پروگرام،400 ارب کا کسان کارڈ،گرین ٹریکٹر،سپر سیڈر،ہزاروں کلو میٹر کی نئی سڑکیں،دھی رانی پروگرام،ہمت کارڈ،مینارٹی کارڈ، لائیو اسٹاک،مفت ادویات کی فراہمی،ستھرا پنجاب پروگرام، لاہور میں پاکستان کے پہلے سرکاری نواز شریف کینسر اسپتال کا قیام جبکہ سرگودھا میں کارڈیالوجی اسپتال کا قیام عمل میں لایا جارہا ہے۔
پہلے سال میں مریم نواز نے ثابت کر دیا ہے کہ وہ ایک کامیاب سیاستدان ہونے کیساتھ ساتھ ایک کامیاب حکمران بھی ہیں۔ یہاں ایک حکومت ایسی بھی آئی ایک سال میں جس نے صرف اپنی سمت درست کی قوم کو ایک سال بعد بتایا گیا کہ ہم سیکھ رہے تھے۔مریم نواز کے منصوبوں سے اب تک کروڑوں لوگ مستفید ہو چکے ہیں ۔ایک سال میں پنجاب حکومت نے اپنی پانچ سالہ ترجیحات قوم کے سامنے پیش کر دی ہیں۔
پہلے سال میں جو عوامی فلاح و بہبود کے منصوبے شروع ہوئے یا مکمل ہو چکے ہیں اسی گراؤنڈ پر حکومت پنجاب آگے بڑھے گی ۔ 2024 ءکا سال باقی صوبوں کی طرح پنجاب کے عوام کیلئے بھی مشکل تھا لیکن 2025ءکا سال پنجاب کے عوام کیلئے ترقی کا سال ثابت ہوگا ۔میری سیاست میں ایک طویل جدوجہد ہے۔ کئی حکومتیں میں نے دیکھیں اپوزیشن میں بھی رہی لیکن مریم نواز کی حکومت کا کام کرنے کا طریقہ باقی سابقہ حکومتوں سے بالکل مختلف ہے ۔
مریم نواز عوام کی نفسیات کو سمجھتی ہیں انکو معلوم ہے کہ مختلف شعبہ جات کے لوگوں کے کیا مسائل ہیں اور ان کا حل کیسے ممکن ہے۔ یہ انہوں نے اپنے پہلے ایک سال میں ثابت کر دیا ہے ۔انکی ترجیحات بہت واضح ہیں سیاست صرف تنقید برائے تنقید کا نام نہیں سیاست خدمت کا نام ہے ۔اگر باقی صوبوں کے وزرائے اعلیٰ کو بھی خدمت کا طریقہ سیکھنا ہے تو مریم نواز ان کیلئے آج رول ماڈل کا درجہ رکھتی ہیں۔ مریم نواز پہلی بار وزیراعلیٰ بنی ہیں لیکن انکے کام کا طریقہ کار بہت واضح ہے اسی لیے باقی صوبوں کے لوگ بھی آج کھلے عام خواہشات کا اظہار کرتے ہیں کہ انکی وزیر اعلیٰ بھی کاش مریم نواز ہوتیں۔
سیاست کو خدمت میں تبدیل کرنے کا یہ ہنر مریم نواز نے اپنے والد میاں نواز شریف سے سیکھا ہے۔ میاں نواز شریف میرے لیڈر ہیں اور مجھے فخر ہے کہ نواز شریف سے زیادہ کوئی بھی حکمران پاکستان کی تاریخ میں ڈلیور نہیں کر سکا۔ میاں نواز شریف کی کارکردگی کا پیمانہ پاکستان اور پاکستان کے عوام ہیں ۔مشکلات سے بھرپور سیاسی زندگی گزارنے والے میاں نواز شریف نے پاکستان کو دنیا میں ایک منفرد پہچان دی ہے چاہے وہ ایٹمی قوت بنا کر ہو یا سی پیک لا کر ہو۔
اسلئے دنیا کے آج بھی بڑے ممالک نواز شریف کو ایک عظیم لیڈر مانتے ہیں ۔صرف ایک سال کے عرصے میں مریم نواز نے بھی دنیا میں اپنی نمایاں پہچان بنائی ہے۔ ان کا طرز حکومت بالکل میاں نواز شریف جیسا ہے۔ چین کے دورے کے دوران مریم نواز کے طرز حکومت کی تعریف کی گئی۔ چین کی کمیونسٹ پارٹی کے ڈائریکٹر نے واضح الفاظ میں کہا کہ میں مریم نواز میں پاکستان کی ایک بڑی لیڈر دیکھ رہا ہوں۔
لیڈر ہمیشہ ملک اور قوم کی خدمت کرنے سے بنتے ہیں بلند و بانگ دعوے کرنے اور جذبات بھڑکانے والی تقریریں کرنے سے لیڈر نہیں بنا جا سکتا اس سے آپ وقتی طور پر لوگوں کو ورغلا سکتے ہیں انکی ذہن سازی کر سکتے ہیں لیکن نہ لوگوں کے پیٹ بھر سکتے ہیں نہ ملک میں خوشحالی لا سکتے ہیں۔ مریم نواز پانچ سال اسی ڈگر پر چلتے ہوئے پنجاب کے عوام کی خدمت کرتے ہیں تو یقینی طور پر پنجاب سے منفی سیاست کرنیوالے اور فتنہ فساد پھیلانے والوں کا مکمل خاتمہ ہو جائیگا ۔
مریم نواز انشاءاللہ پاکستان کی دوسری خاتون وزیراعظم بھی بنیں گی اور عالمی دنیا میں پاکستان کو ایک نئی پہچان دلائیں گی۔کیونکہ پاکستان کا مستقبل مریم نواز ہیں۔
جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔
