حکومت نے کورونا سے متعلق تمام سفری پابندیاں ہٹا لی

حکومت پاکستان نے کورونا سے متعلق تمام سفری پابندیاں ہٹا لی ہیں۔

اس حوالے سے وفاقی وزارت صحت کے حکام کا کہنا ہے کہ حج درخواستوں کے لیے کورونا سرٹیفکیٹ جمع کرانے کی ضرورت نہیں۔

حکام نے کہا کہ مختلف بینک حج درخواستوں کے ساتھ کورونا ویکسینیشن سرٹیفکیٹ بھی مانگ رہے ہیں جو ضروری نہیں، حج پر روانگی سے پہلے سعودی حکومت کی ہدایات کی روشنی میں نئی ایڈوائزری جاری کریں گے۔

نیشنل کمانڈ اینڈ آپریشنز سینٹر (این سی او سی) کا کہنا ہے کہ پاکستان میں داخلے کے لیے کورونا ویکسینیشن سرٹیفکیٹ کی ضرورت نہیں ہو گی، پاکستان آنے والوں کو بھی کورونا نیگٹوٹیسٹ رپورٹ پیش کرنے کی ضرورت نہیں۔

این سی او سی نے کہا کہ سفری پابندیاں ہٹانے کا فیصلہ عالمی ادارۂ صحت کی گائیڈ لائنز کی روشنی میں کیا گیا، پاکستانی ایئر پورٹس، پوائنٹس آف انٹری پر 2 فیصد کورونا ٹیسٹنگ بھی ختم کر دی گئی، ایئر پورٹس پر وبائی امراض سے متعلق نگرانی جاری رہے گی۔