اسرائیلی فوج نے فلسطینی خاتون صحافی کو گرفتار کر لیا

اسرائیلی فوج نے مغربی کنارے کے شہر توبس سے فلسطینی خاتون صحافی کو گرفتار کر لیا۔

فلسطینی میڈیا کے مطابق مذکورہ فلسطینی خاتون صحافی سمیہ جوابریح 7 ماہ کی حاملہ ہیں۔

فلسطینی میڈیا نے بتایا ہے کہ خاتون صحافی کو توبس میں الفارع کیمپ سے گرفتار کیا گیا ہے۔

واضح رہے کہ اس سے قبل اسرائیلی فوج نے فتح پارٹی کے رہنما رفت اولیان کو ٹی وی پر لائیو انٹرویو کے دوران گرفتار کیا تھا۔

فلسطینی میڈیا کے مطابق فتح رہنما مقبوضہ بیت المقدس میں اپنے گھر میں میڈیا کو لائیو انٹرویو دے رہے تھے۔

عرب میڈیا نے بتایا ہے کہ اسرائیلی فوج کی جانب سے چھاپوں کے دوران فلسطینی حکومت کے 1 مشیر کو گرفتار کر لیا گیا ہے۔

عرب میڈیا کے مطابق رام اللّٰہ میں ایک چھاپے میں ممتاز فلسطینی کارکن عہد تمیمی کو بھی گرفتار کیا گیا ہے۔

غزہ: اسرائیلی بمباری، مزید 27 فلسطینی شہید
واضح رہے کہ غزہ پر آج صبح مسلسل اسرائیلی بمباری میں کم از کم 27 فلسطینی شہید ہو گئے ہیں۔

عرب میڈیا کے مطابق غزہ میں آج 15 افراد رفح کے قریبی علاقے تل السلطان میں، 10 افراد الزاویدا میں اور 2 افراد جبالیہ کیمپ میں شہید ہوئے۔

عرب میڈیا کے مطابق اسرائیل کی جانب سے آج بھی خصوصاً غزہ سٹی اور اسپتالوں کے نزدیک بمباری کی گئی، ان حملوں کے بعد غزہ میں شہادتوں کی تعداد 9 ہزار 797 ہو گئی ہے۔