عابدہ پروین کی طبعیت سے متعلق ان کی ٹیم کا بیان سامنے آ گیا

صوفی گائیکی کی ملکہ عابدہ پروین کی طبعیت سے متعلق ان کی ٹیم کا بیان سامنے آ گیا.

پاکستانی معروف اداکارہ مایا علی نے قطر سے لیجنڈری گلوکارہ عابدہ پروین کے ساتھ یاد گار تصویر سوشل میڈیا پر شیئر کی تو، لیجنڈری گلوکارہ کو وہیل چیئر پر دیکھ کر مداحوں میں تشویش کی لہر دوڑ گئی۔

لیجنڈری صوفی گلوکارہ کی ٹیم نے عابدہ پروین کی صحت کے حوالے سے ان کے فکر مند مداحوں کو اپ ڈیٹ دے دی ہے۔

فوٹو اینڈ ویڈیو شیئرنگ پلیٹ فارم انسٹاگرام پر اسٹوری شیئر کرتے ہوئے لیجنڈری گلوکارہ کی ٹیم نے بتایا کہ عابدہ پروین خیریت سے ہیں۔

ان کی ٹیم نے انسٹا اسٹوری شیئر کرتے ہوئے بتایا کہ قطر کے دارالحکومت دوحہ کے نیشنل میوزیم کی عابدہ پروین کی ایک ویڈیو کے حوالے سے ہم نے بہت زیادہ تشویش دیکھی ہے، جس کی وجہ ان کا وہیل چیئر کا استعمال ہے۔

انہوں نے وضاحت کرتے ہوئے لکھا ہے کہ ہم آپ کو عابدہ پرون کی خیریت کا یقین دلانا چاہتے ہیں، الحمدلِلّٰہ وہ خیریت سے ہیں لیکن وہ جس نمائش میں شرکت کر رہی تھیں اس کا راستہ بہت طویل تھا، جس کا بیشتر حصہ انہوں نے خود طے کیا لیکن ان کی سہولت کے لیے انہیں ایک وہیل چیئر دی گئی۔

عابدہ پروین کی ٹیم نے مداحوں کا شکریہ ادا کرتے ہوئے لکھا ہے کہ آپ کی تشویش اور پریشانی پر آپ کو بے حد سراہتے ہیں، یقین رکھیں، ان کی صحت اچھی ہے، شکریہ۔