سندھ اور پنجاب کے تعلیمی اداروں میں موسم گرما کی تعطیلات کا اعلان

صوبہ سندھ اور پنجاب کے سرکاری و نجی تعلیمی اداروں میں موسم گرما کی تعطیلات کا اعلان کر دیا گیا۔

سندھ بھر کے سرکاری اور پرائیویٹ کالجز میں موسم گرما کی تعطیلات کا نوٹیفکیشن جاری کر دیا گیا جس کے مطابق یکم جون سے 31 جولائی تک سرکاری اور نجی کالجز بند رہیں گے۔

اس سے قبل محکمہ اسکول ایجوکیشن سندھ نے موسم گرما کی تعطیلات کا نوٹیفکیشن جاری کیا تھا جس کے مطابق تعلیمی اداروں میں موسم گرما کی تعطیلات یکم جون سے 31 جولائی تک ہوں گی، فیصلے کا اطلاق سندھ کے تمام نجی و سرکاری تعلیمی اداروں پر ہوگا۔

اِدھر پنجاب میں بھی موسم گرما کی تعطیلات کا اعلان کیا گیا۔ محکمہ تعلیم کے مطابق موسم گرما کی تعطیلات 6 جون سے 20 اگست تک ہوں گی، تمام اسکول چھٹیوں کے بعد 21 اگست کو دوبارہ کھلیں گے۔