برطانیہ نے روس کے خلاف جنگ میں یوکرین کو اسٹارم شیڈو لانگ رینج میزائل فراہم کیے جانے کی تصدیق کر دی جبکہ روس نےاقدام کا مناسب جواب دینے کا عندیہ دے دیا۔
برطانوی سکریٹری دفاع بین والس نے ہاؤس آف کامن کو بتایا کہ جدید اسلحہ فراہم کرنے کیلئے روسی افواج کے خلاف لڑنے کیلئے یوکرین کی جانب سے کی گئی درخواستوں پر انہیں اسٹارم شیڈو کروز میزائل فراہم کیے گئے ہیں۔
انہوں نے بتایا کہ میزائل کی فراہمی کا فیصلہ روس کی جانب سے یوکرین جنگ میں مسلسل پیش قدمی اور سول انفرا اسٹرکچر کو نشانہ بنانے کے بعد کیا گیا ہے۔
بین والس نے ہاؤس آف کامن کو بتایا کہ انہوں نے اپنے روسی ہم منصب کو گزشتہ سال دسمبر میں خط کے ذریعے بتایاتھا کہ یوکرین پر مزید حملوں کے نتیجے میں برطانیہ یوکرین کو مزید اسلحہ فراہم کر سکتا ہے، اگر روس حملہ نہ کرتا تو اس سب کی ضرورت ہی نہ پڑتی۔
غیر ملکی میڈیا رپورٹس کے مطابق اسٹارم شیڈو کروز میزائل کی پیداواری کمپنی کا دعویٰ ہے کہ میزائل کی رینج 250 کلومیٹر سے زائد ہے جبکہ امریکی ہمارس میزائل کی رینج صرف 80 کلومیٹر تک ہے۔
بین والس کا کہنا تھا کہ اسٹارم شیڈو کروز میزائل جنگی طیاروں کے ذریعے فائر کیے جائیں گے جس سے یوکرینی پائلٹ محاذ کے قریب جائے بغیر دور سے ہی اپنے اہداف کو نشانہ بنانے کے قابل ہو پائیں گے، جبکہ کم اونچائی سے مارے گئے میزائل دشمن ریڈار پر بھی ظاہر نہیں ہوتے۔
دوسری جانب روسی ترجمان دمیتری پاسکوف نے برطانوی اقدام پر رد عمل دیتے ہوئے کہا ہے کہ یوکرینی افواج کے برطانوی اسٹارم شیڈو میزائل کے استعمال کے رد عمل میں روس کی جانب سے بھی مناسب اور بھرپور جواب دیا جائے گا۔
