مس یونیورس مقابلے میں شرکی مس تھائی لینڈ ملالہ یوسف زئی کی معترف

ایل سیلواڈور میں منعقد ہونے والے عالمی مقابلۂ حسن ’مس یونیورس‘ میں 80 سے زائد ممالک کی حسیناؤں نے حصّہ لیا اور اس مقابلے کا تاج نکاراگوا کی 23 سالہ حسینہ شینس پالاسیوس نے اپنے سر سجا لیا۔

مس تھائی لینڈ اینٹونیا پورسلڈ نے مقابلے میں دوسری جبکہ مس آسٹریلیا مورایا ولسن نے تیسری پوزیشن حاصل کی۔

اس مقابلے کے آخری راؤنڈ میں ان تینوں حسیناؤں کی پوزیشنز کا تعین کیا گیا۔

تینوں حسیناؤں سے ایک سوال پوچھا گیا کہ اگر اُنہیں کسی اور خاتون کی زندگی کا ایک سال گزارنے کا موقع دیا جائے تو وہ کس خاتون کا انتخاب کریں گی؟

مس یونیورس کا تاج اپنے سر سجانے والی شینس پالاسیوس نے اس سوال کے جواب میں 18ویں صدی کی برطانوی فلسفی اور حقوق نسواں کی ماہر میری وولسٹن کرافٹ کا انتخاب کرتے ہوئے کہا کہ اُنہوں نے اپنی محنت اور کوشش سے بہت سی خواتین کے لیے کام کیا اور اُنہیں نئے مواقع فراہم کیے تو میں ان کی طرح زندگی کا ایک سال گزارنا چاہوں گی۔

مس تھائی لینڈ اینٹونیا پورسلڈ نے نوبل انعام یافتہ ملالہ یوسف زئی کا انتخاب کرتے ہوئے کہا کہ میں ملالہ یوسفزئی کا انتخاب کروں گی کیونکہ میں جانتی ہوں کہ آج وہ جس مقام پر ہیں وہاں تک پہنچنے کے لیے انہیں کن مشکلات سے نمٹنا پڑا۔

FINAL Q&A starting with Thailand! @porxild#72ndMISSUNIVERSE #MissUniverse2023 @TheRokuChannel pic.twitter.com/w71IH4kEvY

— Miss Universe (@MissUniverse) November 19, 2023

سوشل میڈیا صارفین کی جانب سے مس تھائی لینڈ کے اس جواب کو بہت پسند کیا جا رہا ہے تاہم عالمی مقابلۂ حسن کے ججز کو مس نکاراگوا کا جواب زیادہ پسند آیا اور وہ مقابلے کی فاتح قرار پائیں۔

مس آسٹریلیا نے اس سوال کے جواب میں کہا کہ میں اپنی والدہ کا انتخاب کروں گی کیونکہ وہ ایک مضبوط خاتون ہیں اور انہوں نے مجھے محنت، بہادری اور طاقت کی قدر سکھائی۔

دوسری جانب مس یونیورس 2023ء میں پہلی بار پاکستان کی نمائندگی ماڈل اریکا رابن نے کی۔

اُنہوں نے ریمپ پر واک کرنے کے لیے ایسے ملبوسات کا انتخاب کیا جس میں پاکستانی ثقافت کے رنگ نظر آئے۔