نواز شریف سیاست سے کنارہ کشی اختیار نہیں کر رہے ہیں: مریم نواز

مسلم لیگ (ن) کی چیف آرگنائزر اور پنجاب سے وزارت اعلیٰ کے لیے نامزد مریم نواز نے کہا ہے کہ وزارت عظمیٰ کا عہدہ قبول نہ کرنے کا مطلب اگر یہ اخذ کیا جا رہا ہے کہ نواز شریف سیاست سے کنارہ کش ہو رہے ہیں تو اس میں کوئی سچائی نہیں ہے۔

سماجی رابطے کی ویب سائٹ ایکس پر مریم نواز نے بیان جاری کرتے ہوئے کہا کہ نواز شریف سیاست سے کنارہ کشی اختیار نہیں کر رہے ہیں بلکہ میں اور شہباز شریف ان کی سربراہی میں کام کریں گے۔

انہوں نے مزید کہا کہ اگلے 5 سال نواز شریف ناصرف بھرپور سیاست کریں گے بلکہ وفاق و پنجاب میں اپنی حکومتوں کی سرپرستی بھی کریں گے انشاءاللّہ۔

وزارت عظمیٰ کا عہدہ قبول نا کرنے کا مطلب اگر یہ اخذ کیا جا رہا ہے کہ نواز شریف سیاست سے کنارہ کش ہو رہے ہیں تو اس میں کوئی سچائی نہیں۔ اگلے ۵ سال وہ نا صرف بھرپور سیاست کریں گے بلکہ وفاق و پنجاب میں اپنی حکومتوں کی سرپرستی کریں گے انشاءاللّہ۔
نوازشریف کی تینوں حکومتوں میں عوام…

— Maryam Nawaz Sharif (@MaryamNSharif) February 14, 2024

مریم نواز کا کہنا ہے کہ نوازشریف کی تینوں حکومتوں میں عوام نے واضح اکثریت دی تھی اور یہ بات وہ انتخابی تقاریر میں میں واضح کر چکے ہیں کہ وہ کسی مخلوط حکومت کا حصہ نہیں بنیں گے، جو لوگ نواز شریف کے مزاج سے وقف ہیں انہیں نواز شریف کے اصولی موقف کا علم ہے۔

ان کا کہنا ہے کہ شہباز شریف اور میں ان کے سپاہی ہیں، ان کے حکم کے پابند ہیں اور ان کی سربراہی اور نگرانی میں کام کریں گے- اللّہ ہمیں کامیابی عطا فرمائے۔ آمین

واضح رہے کہ گزشتہ روز وزارت عظمیٰ کے لیے شہباز شریف کا نام سامنے آنے پر قیاس آرائیاں کی جارہی تھیں کہ نواز شریف سیاست چھوڑ رہے ہیں۔