شعیب ملک نے اپنے لیے اچھا کھیلا ٹیم کے لیے نہیں:سابق کرکٹر عبدالرزاق

سابق کرکٹر عبدالرزاق کا کہنا ہے کہ کوئٹہ گلیڈی ایٹرز کی کپتانی سے فرق پڑا ہے، کراچی کنگز کے میچ میں شعیب ملک نے اپنے لیے اچھا کھیلا ٹیم کے لیے نہیں۔

جیو نیوز کے پروگرام ’’ہارنا منع ہے‘‘ میں بات کرتے ہوئے سابق کرکٹر عبدالرزاق نے کہا کہ روسو کو کوئٹہ گلیڈی ایٹرز کا نیا کپتان بنایا گیا وہ بہت ٹھنڈے ہیں۔

عبدالرزاق کا کہنا تھا کہ سرفراز پچھلے آٹھ سالوں سے کوئٹہ کی کپتانی کر رہے تھے، اسپورٹس مین ہر چیز کو محسوس کرتا ہے۔

سابق کرکٹر نے کہا کہ پشاور زلمی کے میچ میں کپتان بابر اعظم نے اپنا کام کردیا تھا، ٹیم میں ہرکھلاڑی کا اپنا رول ہوتا ہے۔

انہوں نے کہا کہ بابر اور صائم ایوب نے اپنا کام کردیا تھا، بابر اچھا کھیلے، جیتا ہوا میچ ہار گئے، جبکہ دوسری جانب کراچی کنگز کی بولنگ کمزور ہے۔

ان کا کہنا تھا کہ کراچی کنگز کے ایک دو بیٹر کے بعد بیٹنگ ختم ہوجاتی ہے، شعیب ملک نے اپنے لیے اچھا کھیلا ٹیم کے لیے نہیں۔

عبدالرزاق نے مزید کہا کہ کھلاڑی وہی ہوتا ہے جو ٹیم کے لیے کھیلے۔

ہارنا منع ہے میں شریک اداکارہ مریم نفیس نے کہا کہ اسلام آباد کے بعد مجھے لاہور قلندر پسند ہے، جبکہ سنیل منج کا کہنا تھا کہ ہار جیت ہوتی رہتی ہے لاہور اچھا پرفارم کرے گا۔