ایم کیو ایم رہنما فاروق ستار اور مصطفیٰ کمال کی کامیابی کو سندھ ہائی کورٹ میں چیلنج کر دیا گیا

متحدہ قومی موومنٹ (ایم کیو ایم) پاکستان کے رہنماؤں فاروق ستار اور مصطفیٰ کمال کی کامیابی کو سندھ ہائی کورٹ میں چیلنج کر دیا گیا۔

این اے 242
کراچی کے حلقے این اے 242 سے ایم کیو ایم پاکستان کے رہنما مصطفیٰ کمال کی کامیابی سندھ ہائی کورٹ میں چیلنج کر دی گئی۔

مصطفیٰ کمال کی کامیابی کو آزاد امیدوار دوا خان صابر نے چیلنج کیا ہے۔
دوا خان صابر کے وکیل جبران ناصر ایڈووکیٹ نے کہا ہے کہ فارم 45 کے تحت دوا خان صابر 53 ہزار ووٹوں سے جیت چکے تھے جبکہ فارم 47 میں نتائج تبدیل کر کے مصطفیٰ کمال کو جتوا دیا گیا۔

درخواست میں استدعا کی گئی ہے کہ مصطفیٰ کمال کی کامیابی کا فارم 47 کالعدم قرار دیا جائے۔

این اے 244
دوسری جانب کراچی کے حلقے این اے 244 سے ڈاکٹر فاروق ستار کی کامیابی بھی سندھ ہائی کورٹ میں چیلنج کر دی گئی۔

فاروق ستار کی کامیابی کو آزاد امیدوار آفتاب جہانگیر نے چیلنج کیا ہے،

درخواست گزار کے وکیل نے کہا کہ فارم 45 کے تحت آزاد امیدوار آفتاب جہانگیر الیکشن جیت چکے تھے، رہنما ایم کیو ایم ڈاکٹر فاروق ستار کی کامیابی کا فارم 47 کالعدم قرار دیا جائے۔

علاوہ ازیں ایم کیو ایم کے رہنما خواجہ اظہار سمیت مزید دو امیدواروں کی کامیابی بھی سندھ ہائی کورٹ میں چیلنج کر دی گئی۔

این اے 247
این اے 247 سے ایم کیو ایم کے امیدوار خواجہ اظہار کی کامیابی کو چیلنج کیا گیا جبکہ پی ایس 101 سے ایم کیو ایم کے امیدوار معید انور کی کامیابی کے خلاف بھی درخواست دائر کی گئی۔

پی ایس 101
آزاد امیدوار آغا ارسلان نے درخواست میں کہا کہ پی ایس 101 کے فارم 47 میں نتائج تبدیل کر کے ایم کیو ایم امیدوار کو جتوایا گیا۔

آزاد امیدوار سید عباس حسنین نے کہا کہ این اے 247 کے فارم 47 میں نتائج تبدیل کیے گئے، فارم 45 کے مطابق میرے سب سے زیادہ ووٹ تھے۔

این اے 245
اس کے علاوہ این اے 245 سے ایم کیو ایم کے امیدوار حفیظ الدین کی کامیابی بھی سندھ ہائی کورٹ میں چیلنج کی گئی ہے۔

آزاد امیدوار عطا اللّٰہ نے این اے 245 کے نتائج کے خلاف درخواست دائر کی ہے۔

درخواست گزار عطا اللّٰہ کا کہنا ہے کہ فارم 45 میں 38 ہزار ووٹ سے میں کامیاب تھا، فارم 45 کے مطابق حفیظ الدین نے صرف 15 ہزار ووٹ حاصل کیے تھے۔

درخواست گزار نے کہا کہ فارم 47 میں نتائج تبدیل کر کے چوتھے نمبر والے امیدوارحفیظ الدین کو کامیاب قرار دیا گیا، فارم 47 کو کالعدم قرار دیا جائے۔